بۆ پێشکەش کردنی وتار له «دووهەمین کۆنفرانسی هاوبەشی نێودەوڵەتی توێژینەوەی زمان و وێژەی کوردی و فارسی» که له زانستگای کوردستاندا و به ئاریکاری زانکۆی سەلاحەدینی هەولێر و زانکۆی ڕاپەڕینی ڕانیه بەڕێوه دەچێ ڕەچاو کردنی ئەم شێوەنامەیه پێویسته.

• وتاری ڕەسەن و توێژینەوەیی له بواری وێژەی کوردی یا وێژەی بەراوردکاریی کوردی و فارسی و عەرەبی وەردەگیردرێت.
• هەر وتارێ که بەڕێ دەکرێ بۆ ئەم کۆنفراسه دەبێ بەرهەمی تێکۆشان و توێژینەوەی نووسەر/نووسەران بێ و له ئامادە کردنیدا هەموو بنەمایێکی ئاکاری زانستی ڕەچاو کرابێت. هەروەها پێشتر له شوێنێکدا چاپ یا پێشکەش نەکرابێت و یا هاوکات بۆ کۆکفرانس و ژۆرناڵێک نەنێردرابێت.
• وتاره کوردییەکان دەبێ به پێی شێوەنووسین یا ڕێنووسی ستانداردی کوردی بێ. وتاره فارسییەکانیش به پێی شێوەنامەی فەرهەنگستانی زمان و وێژەی فارسی بنووسرێت.
• وتار دەبێ لەخۆگری ئەم بەشانه بێت: کورته(لای ژووری ٢٥٠وشه، به پێی بنەماکانی کورتەنووسی)، وشەی سەرەکی(٥ تا ٧ وشه)، پێشەکی(شرۆڤەی بابەت، گریمانەکان، پرسیارەکانی توێژینەوه، ئامانج، پێشینه و ڕەوتی لێکۆڵینەوه و ...)، شیکاری بابەت و ئەنجام. بە گشتی نابێ له ٢٠ لاپەڕەی A4 زێدەتر بێت. نووسینگەی زانستیی کۆنفرانس وتاری درێژ (زیاتر له ٨٠٠٠ وشه) وەرناگرێ.
• سەردێڕی بەشەکانی جۆربەجۆری وتار(وەک پێشەکی، پێشینه، بنەماکانی تیۆریک و ...) ژمارەگوزاری بکرێن و سەردێڕی سەرەکی و ناوەکی لێک جیاوە بکرێن(بەم شێوه: ١-؛ ١-١-؛ ١-٢-؛ ٢-؛ ٢-١-؛٢-٢-؛٢-٣-؛ و ...).
• هەموو وتارەکان – بێ ڕەچاوکردنی زمانی وتار – دەبێ کورتەی کوردی و فارسییان هەبێ.
• فایلی وتار تایپ­کراو به قەڵەمی ١٣ی فۆنتی Unikurd Hejar و فۆنتی B Lotus(بۆ وتارە فارسییەکان) و فۆنتی Traditional Arabic (بۆ وتارە عەرەبییەکان) و به پێی بنەماکانی ستانداردی وتارنووسی ئاماده بکرێن.
• مەودای نێوان دێڕەکان یەک سانتیمیتر بێت.
• سەردێڕی وتار به قەڵەمی گەوره(Bold) ژمارەی ١٤ و باقی سەردێڕەکانی بەشەکانی وتار به قەڵەمی گەورە(Bold) ژمارەی ١٣ بنووسرێن.
• سدگدفگدف
• وشه لاتینییەکانی نێو دەقی وتار به قەڵەمی ١١ و فۆنتیTimes New Roman بنووسرێت.
• بەرانبەری لاتینی وشەکان له نێو دەقدا و لە نێو کەوان ()ـــدا بنووسرێن. هەروەها سەردێڕ و زاراوه تایبەتییەکان که نووسەر به پێویست دەزانێ شێوەدەربڕینیان بنووسرێ، به ئەلف­وبێی فۆنەتیک له نێو کەوان ()ــدا دابنرێن.
• زانیاریگەلی نووسەر/نووسەران که بریتیه له ناو، ناوی بنەماڵەی نووسەر/نووسەران، ئاستی خوێندن و پلەی زانستی، دیاری کردنی نووسەری بەرپرس، ناونیشانی ئیمەیلی نووسەران، پێوەندی سازمانی(ناوی زانستگا یا پەیمانگا و ...) و هەروەها ناونیشانی پۆستی و کۆدی پۆستی و ژماره تەلەفۆن/موبایل دەبێ له سامانەی کۆنفرانسدا بنووسرێن.
• بەڵگەی نێو دەقی وتار له نێو کەوان()ــدا و بەم شێوه بێت: (ناوی نووسەر، ساڵی چاپی بەرهەم: ژمارەی لاپەڕه)؛ بۆ وێنه: (سەجادی، ١٣٩٥: ٤٧).
• بۆ قورئانی پیرۆز به شێوەی (ناوی سووره: ژمارەی ئایەت) بێ؛ بۆ وێنه: (الرحمن: ٢٠).
• گوێزاندنەوەی دەقاودەقی بابەتێ له سەرچاوەیەکەوه زیاتر له ٣ دێڕ به شێوەی ڕۆچوویی ١.٥ سانتیمیتری له لای ڕاستەوه بێ.
• وشەکان به پێی بنەماکانی جیانووسی تایپ بکرێ، و بە تایبەت نیومەودا ڕەچاو بکرێت؛ بۆ وێنه: گران­کردن، و ... .
• نیشانەکانی خاڵبەندی وەک خاڵ، فاریزە، کۆمای خاڵدار، و دووخاڵ و ... دەبێ بچەسپێنه وشەی پێش خۆیانەوه و لەگەڵ وشەی دوایاندا مەودایەکیان هەبێت. وشەی نێو کەوان یا جووت­کەوانەی بچووک بێ مەودا بن لەگەڵ کەوان یا جووتکەونەکەدا؛ بۆ وێنه: (وێژه)/«وێژه». خاڵبەندیی دوای وشەکان یا ڕسته و عیبارەتی کەواندار و جووتکەواندار، له دوای کەوان و جووتکەوان دابنرێن؛ بۆ وێنه: (سەجادی، ١٣٩٦: ٤٧). یا (سەجادی، ١٣٩٦: ٤٧)، یاخود «». و ... .
• هەر سەرچاوەیەک که له وتارەکەدا کەڵکی لێ­وەرگیراوه، له لیستەی سەرچاوەکانی کۆتایی وتاردا بهێنرێت.
• سەرچاوەکان له کۆتایی وتاردا و به پێی ڕیزی ئەلف­وبێی ناوی بنەماڵەیی نووسەر و به شێوەی لای خوارەوه ڕیز بکرێن:
• کتێب: ناوی بنەماڵەیی نووسەر، ناو. (ساڵی چاپی بەرهەم). ناوی کتێب. ناوی وەرگێڕ/لێکۆڵەر/ساغەوەکەر. شوێنی چاپ: بڵاوگه.
• وتار: ناوی بنەماڵەیی نووسەر/نووسەران، ناوی نووسەر/نووسەران. (ساڵی چاپی بەرهەم). «ناوی وتار». ناوی گۆڤار، دەورە/ساڵ، ژماره، ژمارەی پاپەڕه.
• کۆمەڵەوتار: ناوی بنەماڵەیی نووسەر، ناوی نووسەر/نووسەران. (ساڵی چاپی بەرهەم). «ناوی وتار». ناوی کۆمەڵەوتار، ناوی نڤیسیار یا کۆکەرەوه، شوێنی چاپ: ناوی بڵاوگه، ژمارەی لاپەڕه.
• ماڵپەڕ: ناوی بنەماڵەیی نووسەر، ناوی نووسەر/نووسەران. (ساڵی دانرانی بەرهەم له سەر ماڵپەڕ). «ناوی وتار». ناونیشانی ماڵپەڕ.
• ئەگەر ئەم شێوەنامه به وردی له هەر وتارێکدا ڕەچاو نەکرابێت، ئەو وتاره ناخرێته نێو ڕەوتی هەڵسەنگاندن و وەرگیردرانەوه.